Walpurgisnacht 1

Walpurgisnacht-Ballade
(T: & M: R. Zoss, 1975/2003)

’ S isch einisch am nen Abe aafangs Summer gsy
won i eifach ma de Schueh hingerna
bi gloffen bis d Strasse fertig sy
und i duss im Wald im Mondliecht stah

Ke Luftzug geit dür d Tannezipfle
us em Dickicht schmöckt’s schwär nach Harz
da gseh ni öppis dür d Böim düre blitze:
E Brunne wo glänzt wie weiss-nid-was

Er steit dert i ne re Liechtig inn
zwüsche dreine Erlen im Sumpfgras
u won i jitze wott der Rand aarüehre
merken i: das Ding isch ganz us Glas

I touche d Händ i ds Wasser y
so stärneklar, so früsch u chüehl
doch chuum han i dervo der erscht Schluck gno
berchumen i e so nes glungnigs Gfüehl

THERE‘S SOMETHING IN THE AIR TONIGHT
THAT MAKES US FLY AND FEEL ALLRIGHT

E Harfemusig faht afaa spiele
Elfe mit saphirblaue Flügle
tanze schnäller als Libelle
dür ds Mondliecht, wo lüchtet über de Hügle

Sie näh mi zue sech i ihre Kreis
dert brönnt so nes Füür, mir wird‘s chalt u heiss
wo‘s uf einisch afaat häschere
schnuufe u gruuve – ei Zouberwald!

Füchs gsehn i dert, Falke, Tuube
es Reh, e Wolf, e Salamander
Zuunchünige und o Nachtigalle
wo alli ke Angscht schyne z ha von enander

Zwüsche de Seele vo de grosse Tote
hocke Häxe, die furze gruusig
desume uf ihrne Häxebäse
i Hudle nümm gwäsche mängs Jahrtuusig

THERE‘S SOMETHING IN THE AIR TONIGHT
THAT MAKES US FLY AND FEEL ALLRIGHT

Uf zmal git’s e Chlapf u de isch Rueh
u zmitts drinn steit der Meischter, lue
im sym länge Chleid uus Moos u Farn
Er treit drü schwäri Büecher im Arm

Am Rand vom Füür dert blybt er stah
u tuet als wett er so nes Buech ufschlaa
Doch zersch luegt er zringsetum e jeden aa
u rüeft: «Loset was i nech z säge ha!

Das hie, das isch die alti Gschicht vom Chrieg
gschriben mit nüüt als Mönschebluet
vo faltsche Päpscht u Prophete diktiert!»
und er schiesst’s i ds Füür, wo ufstübt vor Gluet

E Schrei geit dür d Reihe vo den Army-Fans
wo der Hitler vergheit – eis Hüüfeli Sand
der John Lennon singt: «Give peace a chance!»
der Meister aber nimmt der nächscht Band i d Hand:

« O ds Buech vor Vernunft, chuum hundertjährig
hett de Mönsche ke Fryde bracht!
Die einte hei alls, si voll vo Lääri
anderi hei nüüt, u chrampfe Tag u Nacht!»

THERE‘S SOMETHING IN THE AIR TONIGHT
THAT MAKES US FLY AND FEEL ALLRIGHT

Hinger mer faht’s a süfzge, stöhne
Der zwöit Band, verbrönnt ir Gluet
Der Einstein, der Marx hei sech umarmet
aber alli hei zum Meischter gluegt

Er het es dritts Buech vor sech gha
mit schneewysse, lääre Sytte
seit: «Das wär der letscht Band, da!»
u verschwindet ir Nacht mit länge Schritte
E Zytlang blybt’s totenstill…

Doch gly drufabe faat’s afa tanze
Elfe verteile dene, wo sy cho
Harzmilch und Ambrosia
am Himmel obe, lue dert taget’s scho!

Der Mond sinkt über de Bärgen hinger
d Schtärne göh eine nach em andren uus
wo ne Geischterchor aafat singe
e so ne Musig zwüsche Bach und Blues

THERE‘S SOMETHING I THE AIR TONIGHT
THAT MAKES ME FLY AND FEEL ALLRIGHT

’ S isch ds Lied zum nöije Morge
wo mit mer geit, won ig ou bi
als my Bytrag zum dritte Buech
wo du und ig dry schrybe muesch!

One comment on “Walpurgisnacht

  1. Reply schocan Apr 30,2008

    das würd ich ja gern mal hören, lesen kriege ich nicht hin ohne einen Knoten im Hirn. Bis auf die englischen Zeilen….

Leave a Reply